Tri Hita Karana ring Macan Radén


I Gst Putu Samar Gantang

Macan Radén sapunika sinalih tunggil pupulan Satua Cutet Bali Anyar sané karipta olih I Gusti Putu Bawa Samar Gantang kacitak olih Pāramita. Ring cakepan puniki, wénten solas satua cutet sané kasurat, sakadi Wayah Agung, Gatra Saking Wellington, Sasana Budaya Sanggulan Makanten kadi Bengul, Katik Saté, Memedi satak Dukuh, Tonyo, Macan Radén, Krébék Ndang, Pan Jan, I Cerit, Léak Raré.

Ring satua puniki katah madaging pitutur mangda setata éling ring angga utamaning dados angga Bali mangda sampunang kasepan tangkis. Pariindikan sané lempas saking pamargi sampun sering kawacanaang. Sakéwanten arang pisan kamargiang. Indiké punika sakadi nuldulin sang kawi mangda nyurat daging penampené indik kawéntenan jagaté.

Katah banatang wicara sané kasurat. Sakéwanten, sane jimbar kanten indik Tri Hita Karana. Parahyangan, pawongan, palemahan mangda mamargi antar sané kabuatang pisan. Wau katelektakang olih sang kawi katahan sané nungkalik kadi pamargi Tri Hita Karana.

Tetamian Sinalih Tunggil Tri Hita Karana

Tetamian boya marupa tanah kémanten. Tetamian taler marupa tetikas sané patut saluiring manados manusa (hita pawongan). Manusa sané uning tatatiti sané banget aptiang sang kawi. Tetamian lian taler indik nglestariang utawi nincapang pamargi Tri Hita Karanané. Sané manut sang kawi, kantun ring bebaos.

Pangawit tetamian punika saking nyaga tanah Baliné mangda sampunang sayan sué sayan nénten kadruénang olih krama Baliné. Tan bina sakadi krama tamiu dadosné bénjangan krama Baliné. Wit saking punika metu raris cerpén Wayah Agung sané madaging piteket mangda setata jaga tetamian sané marupa tanah.

Paripolah krama Baliné sané seneng ngadol tetamian patut wilangin malih. Tetamian punika patut lestariang, becikang, dabdabin mangda dados mawiguna. Sang nganamiang janten mautsaha utama pisan mangda wénten tamiang. Sakéwanten, ring sampuné séda gelis pisan ngawetuang pikobet ring sang nami. Nénten arang kantos ngawetuang biuta. Midep kantos telas anggén prabia mrebatin kadruéanne.Pegat masemeton, wénten kantos mayuda mawit saking mrebutin tetamian. Ring sapunapiné, anggena srana matutang paripolah ngadol wantah sané nganamiang punika séda. Tetamianné anggén prabéa ngabén.

Wénten pebesen sané patut tulekang sakadi puniki: Mani puan yan yéning nyidayang ngabénang Wayah apang eda nganti ngadep tanah waris. Tanah waris ento sekayané anggon laba merajan ageng. Buina yén ngelah bia padidi lakar ngabénang wayah, eda pesu rebat ngajak nyama, nyanan kedékin gumi (Wayah Agung: 4). Pabesen punika patut pisan. Sakewanten, arang pisan prasida kamargiang. Tetamianné patut becikang anggén srana ngawangun pikayunan sané utama.

Tetamian marupa Tri Hita Karana (hita ring parahyangan, hita pawongan, hita palemahan) katugesang majeng ring para manggala praja mangda nulekang pangarsan sang kawi. Nabdabin utawi nata kawéntenan janané ring Bali. Krama tamiu mangda uningin punapi gumanti tetujonné rauh. Sang rauh mangda nénten ngawetuang pikobet ring pawongan, Pawongan kobet janten pisan jagi nglimbak ring palemahan. Patut nreptiang penduduk liaré ento. Patut sang mawerat negesin aji awig-awig apang tetep manut Tri Hita karanané. Sangkala pilih tur batesin pangsing bek tumlek (Gatra Saking Wellington:11). Janané wantah nénten katreptiang pacang ngawatuang pikebet. Punapi malih wantah sampun sayan katah panyamaan ipunné. I riki sang mawerat becik pisan wantah mrasidayang maprakanti sareng bendésa adat. Santukan, bendésa adat sané uning kawéntenan janané sané rauh.

Tri Hita Karana Tan Palaksana

Sané banget kapikayunin olih sang kawi indik Sasana Budaya Sanggulanné sane makanten kadi bengul. Bengul punika mawit saking anak ngeling, ngawetuang sungsut ring manah. Katah toya panoné medal saking pangksianné kantos bengul. Sang kawi nénten mrasidayang ngibehang kasungsutan kayunné santukan Sasana Budaya Sanggulanné patut ngawerdiang budaya nénten kawigunaang taler nénten karunguang.

Sang kawi éling ring sawitranné sane sampun dados anggota déwan. Kocap becik sareng sang kawi naen nganikaang pacang mecikang Sasana Budaya Sanggulanné. Kantos rusak kori, tampulné ical durung taler wénten sané rungu. Pikayunan sang kawi mangda nué rasa budaya. Mawit saking budaya ngawetuang budhi utama. Utama ring angga taler utama ring anak lian. Punapi malih kawigunan Sasana Sanggulanné dumuné genah para sisyané malajah budaya Baliné taler genah paruman (kaca 20). Manut sang kawi, patut pisan ngawaliang malih kajati mula mangda sayan-sayan katah genah anggén nglimbakang budaya Baliné.

Indik palemahan becik pisan kasurat ring satua Macan Radén. Tri Hita Karananné manut pikayunan sang kawi arang sané kamargiang. Tri Hita Karananné dados wates uger panyengker kuwuban gumi Bali, kémawon pidartan sang Mawerat, manis akecap ring papeosan bebaosan, pait tumaning nyetik adat lan dharmaning parisolah maigama (kaca 47). Katahan Tri Hita Karanané kantun marupa bebaosan. Sané banget pisan kapikayunin indik dangan ngrebah taru. Taru-taru sané wénten ring wanadri sampun sayan ical, kapandung, karebah. Wit saking punika, buroné nénten nué pagenahan. Sinalih tunggil satua macan sampun ical, sané kantun tetamian kuaca macan. Macan sané maurip wantah dados bebaosan kémaon. Sami sampun padem.

Tri Hita Karanané majeng pawongan wénten ring cerpén Krébék Ndang. Krébék nyihnayang suara jagi wénten sabeh. Sakéwanten, wénten krébék nénten ngawetuang sabeh. Krébéké punika kabaos krébék ndang. Sapasira sané dadosanga imba krébék ndang puniki? Parindikan kepala sekolah sané demen nyanjiang insentif. Sakéwanten nénten mrasidayang nagingin. Punapi malih majeng ring guru-guru sané meled polih jinah insentif. Kabenengan pisan jagi rahinan. Raris wénten semaya polih insentif janten seneng pisan para guruné. Sakéwanten nénten kamargiang olih kepala sekolahé. Katah pailehan pangandikan sang kepala sekolah anggéna dadalan, sakadi ayamné keni grubug. Wus Pahing Galungan jeg pastika sampun kaduman jinah ring sekolah, mangda wénten anggen bekel Kuningan bénjang (kaca 56). Becik pisan pangandikané, rahinan dadosangan taméng melanin anggané.

Pupulan cerpén Macan Radén ngindikan Tri Hita Karana sané durungkamargiang patut. Tri Hita Karanané wau ring papaosan kémanten. Tri Hita Karanané wau ring cangkem. Sang kawi mapangapti mangda jati-jati Tri Hita Karanané manut ring kecap sastra. Tetuekné mangda hita kawéntenan kauripanné. Hita punika ngwetuang kaulangunan.

IBW Widiasa Kenitén

Karikatur I Gst Putu Bawa Samar Gantang saking http://www.kaliaja.com

2 responses to “Tri Hita Karana ring Macan Radén

  1. Terima kasih banyak, atas segala dukunganya, semoga pada sukses semua…

    Like

G U E S T B O O K H E R E !!!

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s