I Kambing Takutin Macan


Ditu di alas rangrang, kacrita ane malu ada pakulewargan ia I Kambing luh madan Ni Rabi. Ngelah pianak aukud madan I Ubuh. Risedek sasih kapat, alase lumlum gadang, bet ulian kekayuan ane mentik luung. Tur tusing kuangan padang mentik di alase ento. Di alase ento masih liu buron ane idup ditu. I Kedis, I Gajah, I Macan, I Sampi, I Bojog tur ane lenan.
Kacarita lantas jani I Kambing luh lakar ngulurin indria kema ke tengah alase ngajak pianakne. I Kambing makedadua melila cita, ngulurin manahe liang. Risedek maseneng-seneng ia I Kambing, saget tepukina teken I Macan Gading. I Macan bengong, sawireh tumben nepukin burin buka ento, ngalih amah ditu disawengkon kekuasaan ia I Macan. Laut I Macan maekin tur metakon kene ,” Ih iba buron soleh, nyen iba ?. Dadi bani mai ngelincak ke gumin awake. Awake madan I Macan Gading, ane nitahin sawengkon alase dini. Sing ja ada ane bani tekening awake”. Medingehan munyin I Macan buka keto, masaut lantas ia I Kambing kene, ” Uduh cai macan, mirib cai tusing nawang, kai suba madan I Kambing. Kai nyidang ngamatiang Macan lelima acepokan tur amah kai. Yan I Kambing nenenan kroda, jeg uug alase nenenan, puun baan api ane pesu uli awak kaine. Apang cai tatas nawang, di tanduk kaine nenenan melinggih Ida Sang Hyang Tiga Wisesa. Yang cai mekeneh mapas anake buka kai, sinah cai mati puun, tur atman caine tan rahayu di kedituanne”.
Keto pasautne I Kambing masemu bangras. Ningeh pemunyine I Kambing buka keto, I Macan jeg mekesiab, muane seming, ngejer, takut, tur makecos melaib. Dugas ia I Macan melaib ngawag ulian takutne, ditu kepanggih teken ia I Bojog kampungane I Macan. I Bojog matakon kene, ngudiang kone cai melaib tanpa karuan buka keto tumben. Buina angkihan caine runtag ngangsur “. Mesaut ia I Macan, ” Mara busan icang kacunduk ajak buron aeng. Awakne poleng-poleng, majenggot, metanduk lanying, ia ngorahang ibane I Kambing, kone ia buron sakti tanpa tanding, cang nagih sarapa teken buron sakti totonan. Ento mekrana cang melaib runtag, apang nemu rahayu “.
Di subane keto, ngakak pakruwet I Bojog kedek. Lantas nutur ia I Bojog, ” Kene Macan, jani icang ngorahin anake buka cai. I Kambing totonan sing ja buron aeng tur sakti, sejatine ya anak belog cara NAK BALI BELOG ene (red). Cang ipidan taen masewitra ajak ia, kewala jani cang memusuh ngajak ia, sawireh pidan ada wicara. Nak mula ia I Kambing amah-amahan utawi tetadahan I Macan uli malu”. Ngelantur ia I Bojog, ” Jani kene, cai mejalan alih ia I Kambing, jeg tadah ia. Ia lakare sing nyidang ngelawan. Krana ia sing saja sakti tur aeng”.
Mesaut I Macan, ” Yening keto, cang misadiya kema ke tongosne I Kambing, kewala apang cai milu nyaksiang ditu. Buin besikne, apang mebukti munyin caine Bojog, lautang tegul, saetang ikuh caine ngajak awake. Diprade sengkala, apang ajak dadua nemuang sengkala” . Nah lamun keto idep caine, lautang “, saut I Bojog.
Ajake dadua lantas kema ke tongose ia I Kambing, sedeng luwunge I Kambing ajak panakne ada ditu. I Bojog ngorahin I Macan apang nyarap ia I Kambing. Mare lakar nyarap, jeg mesaut I Kambing. Kene pesautne, ” Uduh cai Bojog, dadi mekelo cang tusing nepukin cai. Dugase pidan cai sanggup ngemaan awake macan papat ukud, ne jani mara aukud cai nyidayang ngemang. Enggalang ada mai, basang icange suba layah, tur getihne lakar ceret wake anggon ngilangang bedak”.
Keto pamunyine I Kambing ane pedingehane teken I Macan. Ditu I Macan mepineh tur meangen-angen. ” Beh idewek anggone mayah utang teken I Bojog“.
Rikala totonan I Macan, baan jejehne jeg mekecos melaib tan metolihan. I Bojog milu masih kakedeng baan ia I Macan. Dapetang makedadua ulung di pangkunge dalem. Tendas ipune belah, polone makecrot, batis ipune elung makedadua laut mati, ulian jejehne ia I Macan teken I Kambing.
Nah keto suba buka pitutur anake wikan. De bes ampah utawi elah makta raga. Sawireh di gumine anak liu pengindrajala. Pineh-pinehang malu setondenne melaku. Apang tusing ketiben bancana utawi sengkala, buka I Macan ane takut teken I Kambing. Pelajahang dewek, apang tusing buin mani puan bakat kene uluk-uluk teken anak len.
Kaambil saking Satua Bali I Kambing Takutin Macan olih I.N.K. Supatra, penerbit CV. Kayumas Agung. Di posting oleh Rare Angon Nak Bali Belog.

G U E S T B O O K H E R E !!!

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s