Satua Mebasa Bali Telaga Alpasara

Telaga Alpasara

I Gancang I Gancing I Gancung di Telaga Alpasara. Ane malu ada katuturan satua unduk Telaga ane maadan Telaga Alpasara. Telaga Alpasara ento tuah asri, linggah, dalem, tur yehne ening. Di pailehan Telaga Alpasara liu tumbuh bunga-bunga ane manca warna, turmaning bone miik. Sekancan bunga ane suba layu, makejang sekar-sekar miik ulung ke Telaga Alpasarane. Waluya kadi pasraman Ida Bethara Yama. Apa mekrana keto, sawireh sekancan warna tunjunge ada di Telaga Alpasara. Di beten tunjunge ento ada makudang-kudang be ane idup ditu. Luire Be Jeleg, Be Mas, Yuyu, Udang, tur ane lenan pada maliang-liang.
Nah, kacrita jani ada Be Jeleg mapenyama ajaka tetelu, ane maadan I Gancang, I Gancing, teken I Gancung. Buka tatelu singja taen kesah uli Telaga Alpasarane ento. Pada sukarena, seger waras ajaka tetelu. Singja lakar taen minehang pakeweh. Sing ja taen kuangan pabuktian utawi tatedaan. Uling kudang warsa kaden suba nongos ditu di Telaga Alpasara. Kadi rasa sing ja taen nawang sebet apa buin ketiben baya.
Kacrita jani sasih ketiga kangkang kone keadanin teken anake midep. Kala ento jeg pragat panas, limuh, tan pati ada ujan tedun. Buk tanah makeber, I Kakayuan nandang lara baan panase tanpa ujan. Tanah tegal tur umane ngempugin, tan prasida ke tandurin teken I Manusa. Keto masih yeh di Telaga Alpasara linggah ngancan ngaes-ngaesan.
Sawatara yeh Telaga Alpasara ne nu ada atenge bandingang teken ane malunan. Tunggak kayu ane maluan nyilem, jani suba ninggil. Lanturang satua, ditu I Gancang meangan-angan tur mepaitungan ngajak adine makadadue I Gancing lan I Gancung.
I Gancang memunyi kene, ” cai I Gancing ajak I Gancung, sawireh buka kene panas gumine, sing buungan jani iraga lakar kena pakeweh. Apa mawinan, sawireh sasihe jani sasih kangkang. Telaga Alpasara ne lakar nyat yehne. Jani kenkenang baan apang Beli teken cai-cai ajak dadua I Gancing lan I Gancung nemu rahayu tanpa nepukin pakeweh totonan “.
Nah paidep Beline I Gancang jani kene, ” lan jani maluin iraga metinggal uling Telaga Alpasara ne ene. Mumpung enu ada trebesan yeh membah. Lan totonan tuwut yang suba lantas teked ditu di loloan pasihe, sing ja ada ane sedeng sumandang sayanin sawireh ditu singja taen yeh enyat “.
Ningeh raos I Gancang buka keto, laut mesaut adine I Gancing, Beli I Gancang, beneh buka keto raos Beline, icang sing maboya teken papineh Beline I Gancang. Sakewala kene, sawireh jani konden maadan nyat yeh Telaga Alpasara ne, sing ja nyandang iraga sumandangsaya. Sawireh sing ja ada jadma ane nawang maka pinangkan ujane. Sing ja nyandang sumandangsaya buka keto. Buin pidan yan prade nyat Telaga Alpasara ne, ditu mara jalanan keneh Beline I Gancang ento “. Keto pesaut ne I Gancing.
Mesaut lantas adine ane paling cenikan ia I Gancung. Kene pengraosne,” Beli I Gancang, icang makedadua, apa kone buin kenehang apang liu. Yan buka icang I Gancung mapineh, sing ja patut iraga metinggal Telaga Alpasara ne ene. Sawireh dini pelekadan icang I gancung, pelekadan Beli I Gancang lan I Gancing. Dini masih iraga nepukin pabuktian ane marupa tetedaan.
Dini kone iraga, I Gancang I Gancing lan I Gancung, uling cenik nganti kelih buka jani nepukin rahayu. Lantas jani mara ada pakeweh, jeg kalahin Telaga Alpasara ne ene. Nista pesan kasengguh sesana iraga buka keto. Pada dosa kone kaucap anake ane tuara tresna teken pekawitan teken palekadan.
Wireh dini icang I Gancung lekad tur kelih bukajani, depang suba dini masih tongos icang mati. Peduman titah Ida Sang Hyang Widhi ane gamel icang. Sawireh sing ja ada ane nawang patitah Ida Sang Hyang Widhi“, Keto kone pesautne I Gancing.
Nah, sawireh keto pesautne I Gancing lan I Gancung, Beli I Gancang mesaut. ” Yan keto buka pamunyin cai I Gancing lan I Gancung ajak dadua, icang tusing ja lempas teken tresna menyama, tur tresna kaping palekadan. Jalan pagehang meyasa nunas ica teken Ida Sang Hyang Widhi mangda Ida sweca nedunang ujan, apang ajak makejang di Telaga Alpasara ne nepukin rahayu”.
Di subane keto, singja kanti nyat yeh Telaga Alpasara ne, saget suba megrudungan gulem di langite. Sinah ne suba swecan Widhi nyalantara ngicenin damuh idane ujan.
Nah keto suba kacritayang ia Be Jeleg I Gancang I Gancing lan I Gancung ajake tatelu, nyalanang tresna menyama, tresna teken kawitan utawi pelekadan, tur pageh meyasa. Ulian tresna tur pageh meyasa, bhakti marep Ida Sang Hyang Widhi , sekancan krama.
Saking buku Satua Bali Mabasa Bali ” Kambing Takutin Macan “ Olih I.N.K. Suputra, sane mejudul Be Jeleg Tresna Telaga, kasurat ring blog oleh Rare Angon Nak Bali Belog.